રેટિંગઃ *** (ત્રણ સ્ટાર્સ)MV5BZTc2ZmQ1YTYtYmU1MC00NzNiLTkwODgtMDZlZWJiMmYxYWM3XkEyXkFqcGdeQXVyMjUxMTY3ODM@._V1_QL50_

ગૂગલ પર ‘ઈન્ડિયન સાયન્સ ફિક્શન મુવીઝ’ લખીને સર્ચ મારીએ તેમાં ગણીગાંઠી હિન્દી અને મેજોરિટી સાઉથ ઈન્ડિયન ફિલ્મોની યાદી હાજર થાય. તેને ચાળીને હિન્દી ફિલ્મોનું લિસ્ટ બનાવીએ તો કિશોર કુમારની ‘મિસ્ટર X ઈન બોમ્બે’થી લઈને હમણાં આવેલી ‘2.0’ને પણ સામેલ કરીએ તો ખ્યાલ આવે કે આપણી સાયન્સ ફિક્શન ફિલ્મોમાં સાયન્સ ઓછું અને ફિક્શન અથવા તો ફેન્ટેસી વધારે રહી છે.
ફિલ્મમેકર્સનું લોજિક એવું છે કે આપણી ઓડિયન્સને સાયન્સ ફિક્શનના નામથી જ અળઈઓ ફૂટવા લાગે છે, એટલે ‘ધારો કે આવું થાય તો?’ એવો સવાલ પૂછીને જે તે કથાવસ્તુ સીધું હાજર કરી દેવાનું અને સાયન્સના ડેલે હાથ દઈને ફરી પાછું આપણા ટિપિકલ મસાલા ભભરાવવા માંડવાના. ફોર એક્ઝામ્પલ્સ, ધારો કે માણસ અદૃશ્ય થઈ જાય તો? (E.g. મિસ્ટર ઈન્ડિયા) એલિયન પૃથ્વી પર આવે તો? (E.g. કોઈ મિલ ગયા) માણસ ટાઈમ ટ્રાવેલ કરીને ભૂતકાળ કે ભવિષ્યકાળમાં જાય તો? (E.g. TV સિરિયલ ઈન્દ્રધનુષ; ફંટૂશ, લવસ્ટોરી 2050) વગેરે. કેમ કે, વધુ પડતી ટેકનિકલ ટર્મિનોલોજી ભભરાવવા જઈશું તો ફિલ્મની હાલત ‘રા.વન’ જેવી થવાના ચાન્સિસ વધુ રહે છે. એટલે આપણી સાયન્સ ફિક્શન ફિલ્મોમાં ‘સાયન્સ’ તો સાબિતી વિનાના પ્રમેયની જેમ સ્વીકારી લેવાનું રહે. જેમ કે, ‘મિસ્ટર ઈન્ડિયા’ ભલે ઓલ ટાઈમ ક્લાસિક મુવી હોય, પણ એમાંય તે ‘ઐસા કોઈ ફાર્મૂલા હો જો ઈન્સાન મેં ઐસા અસર પૈદા કરે કિ ઈન્સાન દિખાઈ હી ન દે ઔર ગાયબ હો જાયે…’ એવું કહીને સરકી ગયા હતા.
આ 215 શબ્દ લાંબી પિંજણ કરવાનું ઓબ્વિયસ કારણ છે 11 જાન્યુઆરીએ રિલીઝ થયેલી ગુજરાતી ફિલ્મ ‘શોર્ટ સર્કિટ’. ફિલ્મના માર્કેટિંગ માટે વહેતી મુકાયેલી ટેગલાઈન રોમાંચક છેઃ ‘સૌપ્રથમ ગુજરાતી સાયન્સ ફિક્શન ફિલ્મ’. બીજો ઈન્ટરેસ્ટિંગ દાવો છે, ‘ટાઈમ લૂપ પર બનેલી મોસ્ટ્લી પહેલી ભારતીય ફિલ્મ.’ વેલ, ટેકનિકલી તો આ દાવો સાચો લાગે છે (કેમ કે, ટાઈમ લૂપ પર દૂર દૂર સુધી કોઈ ભારતીય ફિલ્મ દેખાતી નથી). પરંતુ ‘વિટામિન શી’ની ડિરેક્ટર-એક્ટર જોડી ફૈસલ હાશ્મી અને ધ્વનિત ઠાકરની આ ફિલ્મ વિશે બે ‘ધ નેશન વોન્ટ્સ ટુ નૉ’ ટાઈપના બે સવાલ છેઃ એક તો આ ફિલ્મ કેવી છે? અને બીજો થોડો રિસ્કી સવાલ એ કે આ ફિલ્મ હૉલિવૂડની ફિલ્મની કોપી છે? બંને સવાલના જવાબ મેળવતાં પહેલાં ફિલ્મમાં એક્ઝેક્ટ્લી શું છે તેની સ્પોઈલર વિનાની સ્ટોરીલાઈન જોઈ લઈએ.

સમય સમય બલવાન હૈ
સિમ્પલ ફ્રસ્ટ્રેટેડ કમ્પ્યુટર એક્સપર્ટ સમય (ધ્વનિત ઠાકર) સમયના એવા લૂપમાં ફસાઈ જાય છે, જ્યાં એનો એકનો એક દિવસ ફરી ફરીને રિપીટ થયા કરે છે. આવું શું કામ થાય છે એ કશું સમજે તે પહેલાં સમયની સામે એક ન્યુઝ ચેનલ એન્કર સીમા (કિંજલ રાજપ્રિય)નું મર્ડર થાય છે. હવે સમયની સામે બે ચેલેન્જ છે. એક તો આ ટાઈમ લૂપ કેવી રીતે થઈ રહ્યું છે તે શોધીને તેને અટકાવવાનું અને સીમાનું મર્ડર થતું રોકવાનું. આ લિટરલી રેસ અગેઇન્સ્ટ ટાઈમમાં હીરોની સાથે છે એનો દોસ્તાર-સાઈડકિક ભોપો (સ્મિત પંડ્યા).

શું પહેલી ગુજરાતી સાયન્સ ફિક્શન Copied છે?
ફિલ્મ નગરિયાના ખરેખરા બાશિંદાઓ તો ‘શોર્ટ સર્કિટ’નું પહેલું પોસ્ટર રિલીઝ થયું ત્યારે તેમાં રહેલી ટેગલાઈન ‘સમય અટકી જશે’થી જ પામી ગયા હતા કે આ ફિલ્મમાં ‘ટાઈમ લૂપ’ની થિયરી સાથે અટખેલિઓ કરી હશે. ટ્રેલર રિલીઝ થયું ત્યારે ખુદ મેકર્સે જ આ વાત પર કન્ફર્મેશનનો સિક્કો મારી આપ્યો. પરંતુ ટ્રેલરની સાથે એવી વાત પણ યુટ્યુબની લિંક્સ અટેચ કરીને વહેતી થઈ કે ‘જુઓ જુઓ પહેલી ગુજરાતી સાયન્સ ફિક્શન ફિલ્મ તો હોલિવૂડની 12ઃ01 અને ગ્રાઉન્ડ હોગ ડે જેવી ફિલ્મોની કોપી છે.’ શંકા સ્વાભાવિક હતી, કેમ કે શોર્ટ સર્કિટનું ટ્રેલર ડિટ્ટો 1993માં આવેલી ફિલ્મ 12ઃ01ની લાઈન પર જ જતું હતું. ઉપરથી મેકર્સે પોતાના એક ટ્રેલરમાં જ ‘ગ્રાઉન્ડહોગ ડે’નો ઉલ્લેખ કરીને મામલો ઓર સંગીન કરી નાખ્યો! હવે ફરી પાછો એ જ સવાલ, શું શોર્ટ સર્કિટ 12ઃ01થી પ્રેરિત છે? ટૂંકો જવાબ છે, હા છે.
એક્ચ્યુઅલી, શોર્ટ સર્કિટ 12ઃ01ની ઓલમોસ્ટ રિમેક છે. એટલે સુધી કે તમે પાત્રો અને ઘટનાઓને સામસામાં સરખાવી શકો. પરંતુ તેનાથી પણ વધુ ઈન્ટરેસ્ટિંગ વાત એ છે કે શોર્ટ સર્કિટની શરૂઆતમાં 12ઃ01 અને ટાઈમ લૂપ થિયરી પર બનેલી તેના જેવી બીજી ફિલ્મો તથા તેના મેકર્સને અંજલિ/ક્રેડિટ અપાઈ છે અને આ ફિલ્મ તેનાથી ઈન્સ્પાયર્ડ હોવાનો એકરાર પણ કરાયો છે! યાને કે શોર્ટ સર્કિટ પહેલી ગુજરાતી સાયન્સ ફિક્શન ફિલ્મ હોવા ઉપરાંત એવી પણ પહેલી ગુજરાતી મુવી છે જેણે પોતાના ઈન્સ્પિરેશન સોર્સને ફિલ્મની શરૂઆતમાં જ ક્રેડિટ પણ આપી હોય! (હિન્દીમાં આ જ રીતે શ્રીરામ રાઘવન ક્રેડિટ આપે છે.)

સમયનું શું કરવું?
સાયન્સ ફિક્શનની અનેક શાખાઓ પૈકી એક એવા સમયને પકડો તો ફરી પાછા નવા વિકલ્પો ખૂલે. કાં તો તમે તમારાં પાત્રોને ટાઈમ ટ્રાવેલ કરાવો, કાં એકનો એક સમય ફરી ફરીને આવ્યા કરે એવા ટાઈમ લૂપની ગલીમાં જાઓ યા તો ફિર બેન્જામિન બટનના ક્યુરિયસ કેસની જેમ સમયને રિવર્સમાં લઈ જવાની ફેન્ટેસી કરો. એમાં ‘ટાઈમ લૂપ’ અથવા તો ‘ટાઈમ બાઉન્સ’નો વિષય યા કહો કે ‘પ્લોટ ડિવાઈસ’ પકડો તો તમારી પાસે એકથી વધુ વિકલ્પો ખૂલે. આવનારા સમયમાં શું શું થવાનું છે તેની પ્રોટાગનિસ્ટ (વાર્તાના નાયક કે નાયિકા)ને ખબર છે એટલે એની પાસે કોઈનું મર્ડર કરાવી-રોકાવી શકો, બેન્ક લૂંટાવી કે લૂંટતી બચાવી શકો, તેને લોટરી જીતાડી શકો, ઊંચી પાયરીના મિનિસ્ટરની હત્યાનું કાવતરું પકડાવી શકો… આવી તો અઢળક શક્યતાઓ છે. એ શક્યતાઓ એક્સપ્લોર કરી કરીને જ ટાઈમ લૂપ પર 40-45 ફિલ્મો બની છે. મને દુઃખ એ વાતનું થયું કે શોર્ટ સર્કિટમાં એવી કોઈ નવી શક્યતાઓ વિચારવાને બદલે રેડી રેફરન્સ મટિરિયલને જ ગુજરાતી વાઘા પહેરાવવામાં આવ્યા. સ્વાભાવિક છે કે અઢી દાયકા પહેલાંની અંગ્રેજી ટેલિફિલ્મ જોનારો દર્શક વર્ગ આપણા ગુજરાતીમાં મુઠ્ઠીભર નહીં, સાવ ચપટીભર હશે (ઉત્સાહપૂર્વક ટ્રેલરની લિંક્સ શેર કરનારાઓમાંથી પણ કેટલાયે આખી ફિલ્મ જોઈ હશે તે ક્યુરિયસ ક્વેશ્ચન છે!). પરંતુ ટાઈમ લૂપ પર સાવ નવી વાર્તા ક્રિએટ કરવામાં આવી હોત તો માન ઓર વધી જાત.

શોર્ટ સર્કિટ કેવી છે?
ટૂંકો જવાબ છે, સરસ. ફેમિલી સાથે ઉત્તરાયણની રજાઓમાં 100% જોવાય એવી એન્ટરટેનિંગ ફિલ્મ. વિગતવાર જવાબને ફિલ્મમાં મને શું ગમ્યું અને શું ન ગમ્યું એમ બે કમ્પાર્ટમેન્ટમાં વહેંચવો પડે.

What I liked

  • સબ્જેક્ટઃ માનો કે ન માનો, પણ જ્યારે ટીવી પર નાગિન અને ચુડૈલોનું રાજ ચાલતું હોય, ઓનલાઈન કન્ટેન્ટ પર નેટફ્લિક્સ ટાઈપના કન્ટેન્ટનો દબદબો હોય અને ‘નવી’ ગુજરાતી ઈન્ડસ્ટ્રી પાંચ-પાંચ વર્ષ પછીયે ભાંખોડિયાં જ ભરતી હોય ને ગુજ્જુ બોક્સ ઓફિસ પર કોમેડી જ વેચાતી હોય, ત્યારે માર્કેટમાં એક સાયન્સ ફિક્શન મૂકવી એ ભારોભાર રિસ્કી કામ જ છે. ફિલ્મની સ્ટોરી ગમે તે હોય, પણ થિયેટરમાં આવ્યા બાદ તેની સરખામણી સીધી દેશ-દુનિયાની બેસ્ટમબેસ્ટ ફિલ્મો સાથે થાય અને કોમ્પિટિશન પણ ડાયરેક્ટ હોય. ત્યાં કોઈ ગ્રેસના માર્ક્સ ન મળે. દિલ, દોસ્તી, કોમેડી અને વેવલી ફિલોસોફીથી પણ શોર્ટ સર્કિટે વેલકમ ચેન્જ તો આપ્યો જ છે.
  • સ્પેશિયલ ઈફેક્ટ્સઃ સાયન્સ લેબ, માત્ર ફિલ્મોમાં જ દેખાય એવાં ભેદી સ્ક્રીનવાળાં કમ્પ્યુટર્સ, આકાશમાં દેખાતી નોર્ધર્ન લાઈટ્સ કે પછી પળવારમાં ફટાકડાની જેમ ફાટતા માણસો… ભાગ્યે જ કોઈ જગ્યાએ સ્પેશિયલ ઈફેક્ટ્સમાં કોઈ કમી દેખાય છે કે ન તો તે કોઈ ઠેકાણે મેન્યુફેક્ચર્ડ હોય તેવું લાગે છે.
  • નો ચરબીઃ 126 મિનિટની શોર્ટ સર્કિટ પહેલા સીનથી જ મુદ્દા પર આવી જાય છે. હીરોની મન્ડેન દિનચર્યાથી શરૂ થતી વાર્તા કોઈ પણ સબપ્લોટ્સ કે સોંગ્સ કે ડિટેઇલ્ડ લવસ્ટોરી કે પછી મેન્યુફેક્ચર્ડ કોમેડી સીન્સની ગલીકૂંચીઓમાં ફંટાતી નથી અને સતત મૂળ પ્લોટને વળગી રહે છે. ફિલ્મના એન્ડ ક્રેડિટ્સમાં વાગતા પ્રમોશનલ સોંગને બાદ કરતાં ફિલ્મમાં કોઈ સોંગ નથી. ડિરેક્ટરે ધાર્યું હોત તો એકાદ દિવસના ચક્કરમાં બેકગ્રાઉન્ડમાં એકાદું સોંગ એડ કરી શકાયું હોત. થેન્ક ગોડ એવું નથી થયું. કેદાર-ભાર્ગવે કમ્પોઝ કરેલું એ પ્રમોશનલ સોંગ મસ્ત હોન્ટિંગ છે, btw! યાને કે આપણને કંટાળો આવવાનો વિચાર આવે ત્યાં સુધીમાં સિક્વન્સીસ ફટાફટ બદલાતી રહે છે. એકનો એક દિવસ એકની એક ઘટનાઓ સાથે રિપીટ થતો હોવા છતાં ડાયલોગ્સ અને ઘટનાઓમાં સ્માર્ટ્લી રિપીટેશન ટાળ્યું છે.
  • ડિટેલિંગઃ પહેલા બે પેરેગ્રાફમાં જે પારાયણ કરી એમ સાયન્સને ખો આપીને પતલી ગલી સે નીકલી જવાને બદલે રાઈટર્સે (ફૈસલ હાશ્મી, મોહસીન ચાવડા, ભાર્ગવ પુરોહિત) સાયન્સના ગ્રાઉન્ડ પર ફર્મ ગ્રિપ બનાવી રાખી છે. નોર્ધર્ન લાઈટ્સ, ટાઈમ લૂપ/ટાઈમ બાઉન્સ, ઓટોફજી જેવી અઘરી સાયન્ટિફિક ટર્મ્સ વાપરી છે અને સમજાવી પણ છે (હજી આવી ચાર-પાંચ સાઈ-ફાઈ ફિલ્મો બને તો લર્નિંગ એપ Byju’sનો ગુજરાતી વિકલ્પ ઊભો થઈ શકે!). હા, શોર્ટ સર્કિટ થવાથી કઈ રીતે દિમાગી ફાયદો થાય એ વાત આપણા દિમાગમાં ઊતરી નહીં. બાય ધ વે, જે રીતે આ ફિલ્મમાં શોર્ટ સર્કિટથી શોક લાગવાના ફાયદા બતાવાયા છે, એ જોતાં સેન્સર બોર્ડે એવી પણ સૂચના નીચે ડિસ્પ્લે કરાવવી જોઈતી હતી કે, ‘શોર્ટ સર્કિટ કે કરન્ટ કો છૂના સ્વાસ્થ્ય કે લિયે હાનિકારક હૈ’!
    કન્ટિન્યુઇટીનું પણ કાળજીપૂર્વક ધ્યાન રખાયું હોવાનું દેખાઈ આવે છે. કેમ કે, એકનો એક દિવસ રિપીટ થતો હોય એટલે હીરોને બાદ કરતાં બાકીના લોકોનાં કપડાં, એક્સેસરીઝ વગેરે પણ એક જ રહે એ ધ્યાન રાખવું પડે. મને તો એ સવાલ થયો કે અભિનેતા રાગી જાનીએ કુલ કેટલા ક્રીમરોલ ખાધા હશે?! ન્યુઝ રૂમમાંથી ગુસ્સે થઈને ભાગી જતા ગેસ્ટ પોતાની સાથે કોલર માઈક પણ લેતા જાય એ ડિટેલિંગ પણ ધ્યાન ખેંચે છે.

Things I didn’t like

  • કા…શઃ આગળ કહ્યું તેમ ટાઈમ લૂપ પર ઓલમોસ્ટ 12ઃ01 રિક્રિએટ કરવાને બદલે નવી નવી શક્યતાઓ સાથે પ્લે કર્યું હોત તો વધુ જલસો પડત. લેકિન જેમણે 12:01 નથી જોઈ અને શોર્ટ સર્કિટ જોવાનું વિચારી રહ્યા છે એમણે હાલપૂરતું એ ફિલ્મથી દૂર રહેવું જોઈએ એવું એક સિનેફાઈલ તરીકે મને લાગે છે. કેમ કે, બીજી જોવાયલી ફિલ્મ પહેલી જેટલી તો મજા નહીં જ આપી શકે એ નક્કી વાત છે!
  • ક્લાઈમેક્સઃ ફિલ્મનો ક્લાઈમેક્સ ખાસ્સો અન્ડરવ્હેલ્મિંગ અને ઓલમોસ્ટ જૂનવાણી લાગે છે. એવું જ ફાઈટ્સનું છે. ફાઈટ્સમાં જે એનર્જી ફીલ થવી જોઈએ એ સદંતર મિસિંગ છે. એક પછી એક વ્યક્તિ હુમલો કરે અને છુટ્ટા હાથની દે ધનાધન થાય એ સાયન્સ ફિક્શન ફિલ્મમાંથી સીધા હીરો વર્શિપિંગ સાઉથ ઈન્ડિયન ફિલ્મના સેટ પર આવી ગયા હોય એવું લાગે છે.
  • અંતે તો Hamનું Ham: પ્રમાણમાં નોર્મલ લેવલ પર ચાલતી એક્ટિંગનું લેવલ ક્લાઈમેક્સમાં એન્ટાગોનિસ્ટની એન્ટ્રી સાથે અચાનક ‘Hamફેસ્ટ’ પર પહોંચી જાય છે. ઈવિલ માણસ સાઈકો ટાઈપની લાઉડ એક્ટિંગ કરે તો જ એ ડરામણો લાગે એવું થોડું હોય? વિલનને ક્યાંય વધુ ક્રૂર, વધુ ખંધો, વધુ શાતિર, વધુ ખોફનાક બતાવી શકાયો હોત. અને સલમાનને બદલે એનો ડ્રાઈવર પોતાના પર દોષનો ટોપલો ઓઢી લે એ ટાઈપની સિક્વન્સ હવે બહુ થઈ, બાપા!

આંખે-કાને ચડેલું બીજું બધું
‘વિટામિન શી’ પછી એક્ટિંગમાં ધ્વનિતનો કોન્ફિડન્સ વધેલો દેખાય છે. છતાં હજી એનો અવાજ એની એક્ટિંગ પર હાવી થઈ જાય છે. સ્મિત પંડ્યા એઝ ઓલ્વેઝ સુપર્બ. કોઈએ એની સોલો ફિલ્મ વિશે વિચાર્યું હશે ક્યારેય? કિંજલ રાજપ્રિય ઈઝ ગુડ. (બટ, ફિલ્મમાં એના પાત્રની કોઈ સરનેમ નહીં હોય? ઈવન ટીવીમાં રિપોર્ટિંગ થાય તોય ‘સીમા મેડમ’ તરીકે જ એનું સંબોધન થાય?! મિસ્ટર ઈન્ડિયાની જેમ ‘સીમા સોની’ રાખી દેવું’તું!) અને થેન્ક ગોડ, હવે સ્ક્રીન પર એમની એન્ટ્રી સાથે મને બેકગ્રાઉન્ડમાં ‘છેલ્લો દિવસ’નું BGM નહીં સંભળાય! અર્ચન ત્રિવેદી, રાગી જાની, અંશુ જોશી અને માત્ર અવાજ તરીકે સંભળાતાં અન્નપૂર્ણા શુક્લા એ તમામમાં કશું ખાસ વાંધાજનક નથી. હા, ઉત્કર્ષ મજુમદાર જોઈએ એટલા રૌદ્ર લાગતા નથી (Btw, કાચના દરવાજાની બહારથી અંદરની વાતો ક્લિયર્લી સંભળાય?!) ખુદ ડિરેક્ટર સાહેબ પણ રિપીટ થતા કેમિયોમાં દેખાય છે!
મેહુલ સુરતીનું બેકગ્રાઉન્ડ મ્યુઝિક સરસ છે. એક-બે ઠેકાણે ‘વિટામિન શી’ના એક સોંગની ટ્યુન બેકગ્રાઉન્ડમાં વાગે છે એ માર્ક કરજો! લેકિન ફર્સ્ટ હાફમાં ક્યાંક ક્યાંક ડાયલોગ્સ પર મ્યુઝિક હાવી થતું હોય એવુંય લાગ્યું. સિમ્પલ વાતચીતના સીનમાં પડઘાતો હોય એવા સાઉન્ડનું લોજિક કે બેએક ઠેકાણે ધ્યાનબહાર ગયેલું લિપસિંક સમજથી પરે છે. અચ્છા, આર્ટિફિશિયલ ઈન્ટેલિજન્સની બોલાતી ભાષા અંગ્રેજીમાંથી ગુજરાતીમાં કન્વર્ટ શી રીતે થઈ જાય?
અગેઈન, ‘વિટામિન શી’ની જેમ લીડ એક્ટ્રેસનું નામ એક્ટરની પહેલાં આવ્યું એ ગમ્યું. ગુજરાતી લિપિમાં ટાઈટલ અને એન્ડ ક્રેડિટ્સ જોવાનો આનંદ મારા જેવા ગુજરાતી પ્રેમી માટે તો અનહદ છે. હા, શરૂઆતના ટાઈટલ ક્રેડિટ્સની ફોન્ટ સાઈઝ થોડી મોટી રાખવા જેવી હતી. બોલાતી ગુજરાતી શુદ્ધ અને બોલચાલની ભાષામાં સરસ રીતે ડ્રિબલ થતી રહે છે.
પ્લસ, સિનેમેટોગ્રાફી એક થ્રિલર ફિલ્મને છાજે એવી સરસ છે. હા, વધુ પડતા ક્લોઝઅપ્સ ટાળવા જેવા હતા. જો હું ખોટો ન હોઉં તો ફિલ્મના એક દૃશ્યમાં ‘નાસા’ના સાયન્ટિસ્ટ તરીકે ફિલ્મના સિનેમેટોગ્રાફર જેરેમી રીગન દેખાય છે!
ટાઈમબાઉન્ડ ટાઈપની સ્ટોરીમાં એકનું એક પ્રોડક્ટ પ્લેસમેન્ટ પણ વારંવાર આવે, એ ઈન્ટરેસ્ટિંગ આઈડિયા છે. એનું પેમેન્ટ પણ વધારે મળતું હશે?!

ટાઈમ નિકાલો ભૈયે!
ટાઈમ ટ્રાવેલ પરની સંખ્યાબંધ ફિલ્મો જોઈ હોવા છતાં ‘શોર્ટ સર્કિટ’ તેના બે કલાકના રનટાઈમમાં મજા કરાવે છે એમાં કોઈ બેમત નથી.વીકએન્ડ-ઉત્તરાયણનું મસ્ત મનોરંજન. અને હા, ડિરેક્ટર ‘માર્વેલ’ના ફૅન છે એટલે એબ્રપ્ટલી ફેડ આઉટ થતા મૂવીમાં ઇન્ટરેસ્ટિંગ મિડ ક્રેડિટ સીન છે. હવે હું માથું ખંજવાળું છું કે એ ઓપન એન્ડિંગ છે કે સિક્વલનો ઈશારો?!

હેપી ઉત્તરાયણ!

Reviewed for DivyaBhaskar.com

Copyright © Jayesh Adhyaru. Please do not copy, reproduce this article without my permission. However, you are free to share this URL or the article with due credits.

Advertisements

4 thoughts on “શોર્ટ સર્કિટઃ કરંટ તો છે, બોસ!

  1. ફિલ્મનો રીવ્યુ કરવા માટે પણ કેટલું ઉંડાણભર્યું જ્ઞાન, સિનેમાની સમજ અને ઝીણવટભરી નજર જોઈએ એ આ રીવ્યુ વાંચીને લાગ્યું. ફિલ્મ બનાવવા માટે જેટલી જહેમત લેવાઈ હશે એટલી જ મહેનત અને કાળજી આ રીવ્યુ લખવામાં લેવાઈ હોવાનું સ્પષ્ટ જણાઈ આવે છે. ફેઝલ હાશમી અને જયેશભાઈ બંનેનો સિનેમાપ્રેમ વંદનીય તેમજ પ્રશંસનીય છે. ફિલ્મ જોયા પછી તેને ગમે એટલા સ્ટાર આપીશ, પણ અત્યારે તો આટલો સરસ રીવ્યુ લખવા બદલ જયેશભાઈને પૂરા પાંચ સ્ટાર આપું છું. લખતા રહો. અમે આતુરતાથી તમારા દરેક લખાણની રાહ જોતા રહીએ છીએ.

    Liked by 1 person

  2. The concept is similar to edge of tomorrow but the film is very wonderfully designed according the gujarati films. For a second i thought i was watching a Hollywood film. I loves the way the plot is presented. RJ Dhvanit’s acting is superb👌👍

    Liked by 1 person

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s