Cold Feet વાલા લવ!

રેટિંગઃ *** (ત્રણ સ્ટાર)

manmarziyan-21-3-18પાંચ વર્ષ પહેલાં અનુરાગ કશ્યપે પોતાના પ્રોડક્શની એન્થોલોજી ફિલ્મ ‘શોર્ટ્સ’ના પ્રમોશન માટે ‘ધ વાઈરલ ફીવર’ (TVF) સાથે એક પ્રમોશનલ વીડિયો કરેલો. એમાં મેઈનસ્ટ્રીમ બોલિવૂડ મુવીઝની જબરી ખિલ્લી ઉડાવેલી. અનુરાગ કહે, ‘આપણે એક રોમેન્ટિક કોમેડી ફિલ્મ બનાવીએ. જેમાં છોકરો-છોકરી એકબીજાને પ્રેમ કરે છે. પછી છોકરો બીજા કોઈ છોકરાને પણ પ્રેમ કરતો હોઈ શકે. છોકરીને પણ બીજું કોઈ પ્રેમ કરતું હોઈ શકે. એના પ્રેમમાં પાછું કોઈ પાંચમું હોય. બજેટ પ્રમાણે આપણે વધુ ને વધુ સ્ટાર્સને કાસ્ટ કરતા જવાના. એટલે લવ ટ્રાયેંગલ નહીં, લવ ક્વાડ્રાંગલ, પેન્ટાગન, હેક્ઝાગન… એવું કંઈક.’ એમાં એણે કરન જોહર અને ઈમ્તિયાઝ અલીને પણ સળી કરેલી.

***

હવે કટ ટુ 2018.

એ જ અનુરાગ કશ્યપ, ઈમ્તિયાઝ-આદિત્ય-જોહર-ભણસાલીના બીબામાં પોતાનો ક્રિએટિવ જ્યુસ રેડે છે અને ‘મનમર્ઝિયાં’ નામની ડિશ સર્વ કરે છે. પ્યોર મેઈનસ્ટ્રીમ મુવી. નો ખૂન-ખરાબા, નો ગાલી-ગલોચ, ‘ફ્યાર’-મોહબ્બત, નાચના-ગાના, લવ-સેક્રીફાઈસ એટસેટરા. યાને કે સમય સમય બલવાન હૈ, નહીં અનુરાગ બલવાન, કશ્યપે રોમ-કોમ બનાઈયો, વોહી લવ વોહી ટ્રાયેંગલ!

***

ઈમેજિન કરો, અમૃતસરની તંગ ગલીઓમાં એક કપલ છે. વિકી સંધુ aka ડીજે સેન્ડ્સ (વિકી કૌશલ) અને રુમી (તાપસી પન્નુ). બંને એવો ડીપલી ઘૂસ કે પ્યાર કરે છે કે આઈફોન અને મોબાઈલ ચાર્જરની પિનની જેમ એકબીજામાં ઘૂસેલાં જ હોય! હવે પ્રોબ્લેમ એ છે કે રુમી કે ઘરવાલે એદા બ્યાહ કરાંદે વાસ્તે લડકા ઢૂંઢ રહિયાસી. કેમ કે, ઘર મેં દુજ્જી લડકી બૈઠી હૈ, જો સયાની હો ચલી હૈ, ઉસકે ભી હાથ પીલે કરને હૈ. લેકિન શાદી કા નામ સૂન કે આ સેન્ડ્સ કે પાંવ કે નીચ્ચે સે સેન્ડ ખીસક જાતી હૈ. ધ ગ્રેટ બોલિવૂડ કમિટમેન્ટ ફોબિયા! ત્યાં એન્ટ્રી થાય છે બિદેસી બાબુ રોબી (અભિષેક બચ્ચન)ની, જે લંદન વિચ બેન્કર હૈ, અને અમ્રિતસર વિચ કુડી ઢૂંઢને દે વાસ્તે આયા સી. નેચરલી, ધ ગ્રેટ બૉલિવૂડ કોઈન્સિડન્સ અકર્સ અને એને મેરેજ બ્યુરોવાળા સાડી રુમીનો જ ફોટો બતાવે. રોબી પ્રાને રુમી દે નાલ પહેલી નજર વિચ ઈશ્ક હો જાંદા હૈ.

તો ભાઈઓં ઔર બહનોં, અબ દેખના યે હૈ કિ રુમી ક્યા કરતી હૈ? કમિટમેન્ટ કે નામ પે પોટી કર દેનેવાલે આશિક કો છોડ કે ડિપેન્ડેબલ ‘હસબંડ મટિરિયલ’ રોબી દે નાલ બ્યાહ કર લેગી? (ટ્રેલર દેખ કે તો ઐસા હી લગતા હૈ). અગર ઐસા હોતા હૈ તો ક્યા રુમી અપને આશિક કો ઔર આશિક રુમી કો ભૂલ પાયેંગે? રોબી અપની બીવી કે આશિક કે બારે મેં જાન કર ક્યા રિએક્ટ કરેગા? યે દેખિયે ફ્લિમ મેં આપ લોગ!

***

આ સ્ટોરી સાંભળીને તમને તમારા સિનેમેટિક એક્સપોઝર પ્રમાણે ‘વો સાત દિન’થી લઈને (મૈત્રેયી દેવીની નોવેલ ‘ન હન્યતે’) ‘હમ દિલ દે ચૂકે સનમ’, ‘જબ વી મેટ’, ‘તનુ વેડ્સ મનુ’ વાયા તમિળની ‘મૌન રાગમ’ જેવી ફિલ્મો યાદ આવી જશે. ફિલ્મમાં જે રીતે કમિટમેન્ટ ફોબિયા અને પ્યાર-ફ્યારની કન્ફ્યુઝન પ્લે કરવામાં આવી છે એ જોઈને ‘કોકટેલ’, ‘શુદ્ધ દેસી રોમાન્સ’ જેવી અઢળક ફિલ્મો દિમાગમાં નાગિન ડાન્સ કરવા માંડશે. એનું કારણ એ છે કે શાદી-જિંદગીભર કા કમિટમેન્ટ-છેલ્લી ઘડીએ બૅકઆઉટ… એ બધા કન્સેપ્ટ્સનો આપણા ફિલ્મમૅકરોએ ઈલેક્શન્સમાં ‘રામ મંદિર’ના મુદ્દાની જેમ કસ કાઢ્યો છે. અહીં મજા સ્ટોરીમાં નહીં, બલકે રાઈટર કનિકા ધિલ્લોંએ લખેલાં કેરેક્ટર્સમાં અને અનુરાગ સ્ટાઈલના પ્રેઝન્ટેશનમાં છે.

અનુરાગની મજા એ છે કે એ ક્લિશે સ્ટોરી પર ફિલ્મ બનાવશે, તોય ટણી તો ઓફબીટની જ રાખશે. અનુરાગ કશ્યપે ડિરેક્ટ કરેલી ‘મનમર્ઝિયાં’માં એક સીન છે. ફિલ્મનાં બે લીડ કેરેક્ટર્સ (તાપસી અને અભિષેક) ફુલ ટલ્લી થઈને અડધી રાત્રે અગાશી પરથી ચિલ્લમ-ચિલ્લી કરી રહ્યાં છે. તેમાં એ બંને ‘શોલે’ના વીરુની સ્ટાઈલમાં ‘ગાંવવાલોં’ એટલે કે ‘બોલિવૂડ’ એન્ડ ‘ઈન્ડિયાવાલોં’ને સંબોધીને ‘કુછ કુછ હોતા હૈ’થી ‘DDLJ’ને અંજલિ આપતી સળીઓ કરે છે.

***

હાડોહાડ પ્રીડિક્ટેબલ હોવા છતાં ‘મનમર્ઝિયાં’ને ધ્યાનથી જોશો તો દિમાગમાં બત્તી જલશે કે હાઈલા, આ તો અનુરાગની જ ‘દેવ ડી’ની પારોના પોઈન્ટ ઑફ વ્યૂથી બનાવેલી રિમેક છે!

તાપસી અને વિકી કૌશલનાં કેરેક્ટર્સ ખાસ્સાં ઈન્ટરેસ્ટિંગ છે. વિકીના રોલ મોડલ છે રૅપર્સ બાદશાહ અને યો યો હની સિંઘ! એના વહેમમાં એ ભાઈ પણ ‘ડીજ્જે’ બની ગયા છે. કલર કરેલા વાળ, ચિત્ર-વિચિત્ર હેરસ્ટાઈલ, બોબ માર્લેનાં ટીશર્ટ્સ, પિયર્સિંગ, ટેટૂ, ડાબા હાથમાં એકસાથે બબ્બે ઘડિયાળ પહેરવી અને આખો દિવસ સુટ્ટેબાજી… પણ પોતાનું કશું ક્રિએટ નહીં કરવાનું. બસ, ક્રિએટિવ હોવાના વહેમમાં ફરવાનું. રુમી (તાપસી) અને આ ક્રિએટિવ ફાંકેબાજીના વહેમ સિવાય એની લાઈફમાં ત્રીજો કોઈ ગોલ જ નહીં.

જ્યારે રુમી (તાપસી)નું નામ ભલે 13મી સદીના સૂફી સંત પરથી પાડ્યું હોય, પણ એનામાં શાંતિનો એકેય છાંટો નહીં. જીભ જાણે કરવતથીયે તેજ. માતા-પિતા નાનપણમાં જ ગુજરી ગયેલાં. એટલે કાકા-કાકી-દાદાના હાથ નીચે પેમ્પરિંગમાં મોટી થયેલી એટલે ધાર્યું કરતી આવી. પપ્પાની જેમ હોકી પ્લેયર બનવાની ટ્રાય કરી, હવે સ્પોર્ટ્સના નામે સવારે જોગિંગ કરે અને કાકાની સ્પોર્ટ્સની દુકાનમાં હોકીઓ વેચે. એમાંય બેવકૂફ ગ્રાહકને ખખડાવી નાખતાં પળભરનોય વિચાર ન કરે. ધ્યાનથી જોશો તો સમજાશે કે આ ફિલ્મ રુમીની કમિંગ ઑફ એજ સ્ટોરી પણ છે, જેમાં એ ધીમે ધીમે મૅચ્યોર થાય છે (વિકી મૅચ્યોર થાય છે કે નહીં તેમાં અત્યારે ડિરેક્ટરને રસ નથી). 

રુમી અને વિકી બંને લોહચુંબક અને લોખંડ જોઈ લો. રૂમી માટે વિકી પ્રા જૅકી ચેનની જેમ અગાશીઓ કૂદીને આવે. અને બંનેએ જાણે નક્કી કર્યું હોય કે આ દુનિયા માત્ર સેક્સને પાત્ર. એમ શેરડીનાં ખેતરથી લઈને ડીજે સ્ટુડિયો, ઘર ગમે ત્યાં દિવસમાં બબ્બે વાર બસ, ગપુચી ગપુચી કરવાનું એટલે કરવાનું! ડિસન્સી નામનો કોઈ શબ્દ આ બંને નફ્ફટ પ્રેમીઓની ડિક્શનેરીમાં નથી. બંને કઢંગી હાલતમાં બંધ રૂમમાં પકડાય તો જરાય શરમાયા વિના રૂમી પોતાનાં દાદા-કાકીને કહી દે, ‘હાં, તો ક્યા હૈ?!’ એની ફિલોસોફી ક્લિયર છે, ‘જો લોગ શર્મ કરતે હૈ, વોહી આગે જા કે સુસાઈડ કરતે હૈ!’

અહીં અનુરાગ કશ્યપનો ટચ પણ આવે. જ્યારે જ્યારે રૂમી દ્વિધામાં-કન્ફ્યુઝનમાં દોડતી-જતી હોય, ત્યારે શહેરના રસ્તાઓ પર-બસ સ્ટોપ પર ગમે ત્યાં બે જોડિયા બહેનો (રિયલ લાઈફની ડાન્સિંગ ટ્વિન્સ પૂનમ અને પ્રિયંકા શાહ) એકસરખાં કપડાંમાં ડાન્સ કરતી દેખાય. એ બંને બહેનો તાપસીની દિમાગી ઉલઝનનું મૅટાફર જોઈ લો. આવું જ ફિલ્મના મૅલ કેરેક્ટરની બાબતમાં પણ બને છે. ફિલ્મના બે સીનમાં પાત્રોનાં મનની વાત કહેવા માટે ટેલિવિઝન પર ચાલતી ‘એનિમલ પ્લેનેટ’ જેવી કોઈ ચેનલના વોઈસ ઓવરનો પણ મસ્ત ઉપયોગ કરાયો છે.

અભિષેક બચ્ચનનું કેરેક્ટર ઘણે અંશે ‘હમ દિલ દે ચૂકે સનમ’ના અજય દેવગણ અને ‘મૈં પ્રેમ કી દીવાની હૂં’ના પોતાના જ પાત્રનું વર્ઝન લાગે. એને ખબર છે કે આ છોકરી (રૂમી-તાપસી) એટમ બોમ્બ છે, ભયંકર મૂંહફટ છે, આખા અમ્રિતસરમાં એના વિકી સાથેના ‘ફ્યાર’ (F@#k વાલા પ્યાર)ના કિસ્સા મશહૂર છે. છતાં રૂમીનું લોહચુંબક એને પણ ખેંચી લે છે. ભૂતકાળ ભૂલીને રૂમી જેવી છે તેવી-એના કોમ્પ્લિકેટેડ રિલેશનશિપ સ્ટેટસ સાથે કોઈ કડવાશ વિના એને એક્સેપ્ટ કરવાની એની ખુલ્લાશ, ‘તનુ-મનુ’ના માધવન જેવો ઓવર રિઝર્વ્ડ પણ નહીં ને ‘હમ દિલ..’ના વનરાજ (અજય દેવગણ) જેવો રેન્ડમલી ઓવર રિએક્ટિવ પણ નહીં. આ ખાસિયતોને કારણે અભિષેકનું કેરેક્ટર આપણને ગમવા માંડે છે. હા, એના પાત્રમાં પણ કેટલીક સિક્રસી છે. જેમ કે, એ લંડનમાં પાઘડી નથી પહેરતો, અમૃતસર એરપોર્ટમાં બહાર આવતાં પહેલાં પહેરે છે. એક્ઝેક્ટ ઈન્ટરવલની ટ્વિસ્ટી મોમેન્ટ પર એ પાઘડી ફગાવીને સિગારેટનો ઊંડો કશ મારે છે, ત્યારે લાગે કે એના પણ કોઈ છૂપા શૅડ્સ છે, જે ડિરેક્ટર ક્યારેય એક્સપ્લોર કરતા જ નથી.

યાને કે ફુલ માર્ક્સ ટુ વિકી કૌશલ, તાપસી અને અભિષેક બચ્ચન. યાર, અભિષેક બચ્ચન શા માટે નહીં ચાલતો હોય? એ કંઈ સાવ તુષાર કપૂર કે ફરદીન ખાન થોડો છે?!

***

ક્લિશે હોવા છતાં આ સ્ટોરીમાં ધીમી ધીમી મજા આવ્યા કરે છે તેનું બીજું સ્ટ્રોંગ કારણ છે આ ફિલ્મનું મ્યુઝિક. ઘણા સમયે અમિત ત્રિવેદીએ આવું ઓફબીટ મ્યુઝિક આપ્યું છે. આ મ્યુઝિકલ લવ-લસ્ટ-કષ્ટ સ્ટોરીમાં તેર જેટલાં સોંગ્સ છે, જેના પંજાબી ફ્લેવરવાળા શબ્દો ‘દેવ ડી’ ફેમ શેલીએ લખ્યા છે. એક્ચ્યુઅલી, ‘મનમર્ઝિયાં’નું મ્યુઝિક સાંજનું કે લોંગ ડ્રાઈવનું મ્યુઝિક છે. કોઈ સાંજે (તબિયત અને પરમિશન પ્રમાણેનાં) માદક પીણાં સાથે આ સોંગ્સની ફ્લેવર કંઈક અલગ જ આવે એવું અમે સોબરાવસ્થામાં માનીએ છીએ. (બાય ધ વે, પીણું અને ડ્રાઈવને મિક્સ ન કરો એ ઈચ્છનીય છે.)

ફિલ્મની ફ્લેવરમાં ઉમેરો કરવા માટે ‘સેક્રેડ ગેમ્સ’ ફૅમ સિનેમેટોગ્રાફર સિલ્વેસ્ટર ફોન્સેકાએ જાતભાતની વાનગીઓના ક્લોઝઅપવાળા મસ્ત મોન્ટાજ બનાવ્યા છે. જલેબી, સમોસા, લસ્સી, પાણીપુરી, લાડુ, ચા, ગાજર-ફ્લાવરનું અથાણું, પનીર વગેરેના ક્વિક મોન્ટાજ માર્ક કરજો (આ સિલ્વેસ્ટર ફોન્સેકાની ઓફિશિયલ વેબસાઈટ http://sylvesterfonseca.com પર જઈને એમનો ઈન્ટરેસ્ટિંગ પોર્ટફોલિયો ચેક કરવા જેવો છે). કશ્મીરની ટેરરિઝમ વિનાની હનીમૂન બ્યુટિ પણ મસ્ત રીતે ઝીલાઈ છે, ખાસ કરીને ત્યાંના ડ્રોન શોટ્સ.

‘મનમર્ઝિયાં’ના સ્ટાર્ટિંગ ક્રેડિટ્સમાં અમૃતા પ્રીતમને પણ ક્રેડિટ આપવામાં આવી છે. આપણને થાય કે એમને અચાનક કેમ યાદ કર્યા હશે, ત્યાં જ ઈન્ટરવલ વખતે બૅકગ્રાઉન્ડમાં સંભળાય ‘મૈં તેનૂ ફિર મિલાંગી…’

આ સ્ટોરી પારોના પોઈન્ટ ઓફ વ્યૂથી કહેવાઈ છે. એટલે પારે યાને કે રૂમીની લાઈફમાં જે પાત્રનું મહત્ત્વ વધે તેના સીન્સ ધીમે ધીમે વધતા જાય અને બીજું પાત્ર હાંસિયામાં ધકેલાતું જાય. સતત ગ્રે અને ડાર્ક બતાવવા માટે નામચીન કશ્યપે જે રીતે ‘દેવ ડી’ અને હવે ‘મનમર્ઝિયાં’માં પોઝિટિવ અપ્રોચ લીધો છે એ સુખદ આશ્ચર્ય છે. પણ હા, જે રીતે સેક્સને વેપન તરીકે ઉપયોગ થતું બતાવ્યું છે એ જોઈને ઓલ્ડ સ્કૂલવાળા લોકોને આંચકો લાગી શકે.

આ બધી ફ્લેવર્સને કારણે જ ‘મનમર્ઝિયાં’ એક તદ્દન ક્લિશે સ્ટોરી હોવા છતાં માણવાની હળવી હળવી મજા આવે છે. બાકી તેની પ્રીડિક્ટેબલ સ્ટોરી અને ‘કન્ફુજિયાગીરી’ સતત 2 કલાક ને 37 મિનિટ સુધી ચાલ્યા કરે છે, રિપીટ થયા કરે છે. આ સ્ટોરી અગાઉ અનેક વખત જોઈ ચૂક્યા છીએ એટલે આપણને ખ્યાલ જ હોય છે કે એન્ડમાં શું થવાનું છે. માત્ર ફિલ્મની ટ્રીટમેન્ટ અને ફ્લેવરને કારણે જોયા કરીએ છીએ. ‘મનમર્ઝિયાં’ને નડેલા આ સૌથી મોટા ડ્રોબેક્સ હતા. બાકી બબ્બે વખત ‘માન્યવર’નું પ્રોડક્ટ પ્લેસમેન્ટ આવે એવા વેપારીકરણને તો હવે ક્યાં કોઈ ડ્રોબૅક ગણે જ છે!

અનુરાગ કશ્યપ પાસેથી કોઈ ફ્રેશ રોમેન્ટિક સ્ટોરીની અપેક્ષા હતી, જેના માટે હજી રાહ જોવી પડશે.

Published in DivyaBhaskar.com

Copyright © Jayesh Adhyaru. Please do not copy, reproduce this article without my permission. However, you are free to share this URL or the article with due credits.

Advertisements

One thought on “મનમર્ઝિયાં

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s