3 સ્ટોરીઝ

અધકચરો આનંદ

***

રેટિંગઃ **½ (અઢી સ્ટાર)

  • 3-storeys-poster-bollywormકેટલાક શુક્રવાર એવા હોય જ્યારે થિયેટરોમાં એકથી વધુ ફિલ્મો રિલીઝ થઈ રહી હોય અને છતાં તમે ફિલ્મ જોવા જવાને બદલે ઑફિસે પહોંચી જાઓ. કેમ કે, ફિલ્મ જોવા જવાનો ધક્કો જ ન વાગે. આ શુક્રવારે વિચિત્ર ચશ્માં પહેરેલી તાપસી પન્નુની ફિલ્મ ‘દિલ જંગલી’, જમીન અને હવા સાથે સંભોગ કરતાં શીખવતી, એકબીજાના શરીરે બૉડી લોશન ચોપડતાં શીખવતી અને ‘સનસની’માંથી ઉઠાવેલા ડાયલોગ્સ લઇને આવેલી ‘હેટ સ્ટોરી 4’ રિલીઝ થઈ રહી હતી. એ બંને જોવા કરતાં એપેન્ડિક્સનું ઑપરેશન કરાવી લેવું સારું એમ વિચારીને ઑફિસ ભણી પ્રયાણ કર્યું (ના, ઑપરેશન કરાવવા નહીં, કામ કરવા). પછી ટાઇમ કાઢીને ‘3 સ્ટોરીઝ’ જોઈ કાઢી. કેમ કે, બાકીની બંનેમાંથી એ પ્રમાણમાં મૅચ્યોર લાગતી હતી.
  • નામ પરથી એટલું તો ક્લિયર હતું કે આ ફિલ્મ ત્રણ અલગ અલગ વાર્તાઓનો ગુલદસ્તો હશે. કંઇક એવો પણ અંદાજ હતો કે આ ફિલ્મ કોઇક રીતે એકબીજા સાથે સંકળાયેલી પણ હશે. જેમ કે, મણિ રત્નમની ‘આયુથા એઝુથુ’ (એની હિન્દી રિમેક એટલે ‘યુવા’)માં હતું, નાગેશ કુકુનૂરની ‘તીન દીવારેં’માં હતું, નિખિલ અડવાણીની ‘સલામ-એ-ઇશ્ક’માં હતું, એલેહાન્દ્રો ગોન્ઝાલેસ ઇનારિતુની ‘બેબેલ’માં અને એમની જ ‘એમોરેસ પેરેસ’માં પણ એવું જ હતું. એકથી વધુ વાર્તાઓને એકબીજા સાથે જોડવાને બદલે ઘણી વાર ફિલ્મ મૅકર્સ દોરામાં મણકા પરોવતા હોય એ રીતે એકબીજાથી સ્વતંત્ર એવી ટૂંકી વાર્તાઓને એક ફિલ્મમાં પરોવી દે. જેમ કે, ‘દસ કહાનિયાં’, અનુરાગ કશ્યપે પ્રોડ્યુસ કરેલી ‘શોર્ટ્સ’, રામુની ‘ડરના મના હૈ’‘ડરના ઝરૂરી હૈ’, બહુ ગવાયેલી ‘બોમ્બે ટૉકિઝ’ વગેરે. અમે એક જૂની જૅપનીસ હોરર ફિલ્મ જોયેલી ‘ક્વાઈદાન’. એમાં પણ આવું જ હતું. એ ફિલ્મનું હૉન્ટિંગ બૅકગ્રાઉન્ડ મ્યુઝિક આજેય કાનમાં ગૂંજે છે અને અમે ‘તારક મેહતા કા ઉલ્ટા ચશ્મા’ જોઇને એને કાઉન્ટર કરીએ છીએ (યુ નૉ, લોહા લોહે કો કાટતા હૈ એન્ડ ઑલ! આયમ જોઓઓકિંગ!)
  • નડિયાદી ભૂસાની જેમ એકમાં અનેક રીતે પેશ કરાતી આવી ચવાણાછાપ ફિલ્મોને ‘એન્થોલોજી મુવીઝ’ કે પછી ‘હાઇપરલિંક સિનેમા’ કહે છે. ‘3 Storeys’ના સ્પેલિંગ પરથી ક્લિયર હતું કે આ ફિલ્મની ત્રણ વાર્તાઓ ત્રણ માળની એક બિલ્ડિંગનાં અલગ અલગ ઘરોમાં રહેતા લોકોની વાત કહેતી હશે. ‘લિપસ્ટિક અન્ડર માય બુરખા’માં હતું એવું જ કંઇક. એમાં ભોપાલની વાત હતી, અહીં મુંબઈની એક લોઅર મિડલ ક્લાસ ચાલીની વાત છે. એક સ્ટોરીમાં બીજી સ્ટોરીનાં પાત્રો અવર જવર કર્યાં કરે, માત્ર તેમનું ફોકસ જેની વાર્તા ચાલતી હોય તેના પર રહે.
  • પહેલી વાર્તા છે એકલી રહેતી વૃદ્ધ, ગોવાનીઝ વિધવા સ્ત્રી મિસિસ ફ્લોરા મેન્ડોન્સા (રેણુકા શહાણે)ની. ફ્લોરા આ ચાલીમાં જ રહીને મોટી થઈ છે, પણ હવે એને પોતાની આ ખોલી વેચી કાઢવી છે. એ પણ માર્કેટ પ્રાઇસ કરતાં ચારગણા ભાવે. એક દિવસ સલમાન ખાનના ડુપ્લિકેટ જેવો દેખાતો એક યુવાન (પુલકિત સમ્રાટ) તે ખોલી ખરીદવા આવે છે. ઉપરથી એકદમ સિમ્પલ લાગતી એમની વાતો પાછળ પુણેનાં મિસળ પાંવ જેવું તીખું તમતમતું સિક્રેટ છુપાયેલું છે.
  • બીજી સ્ટોરી છે એ જ બિલ્ડિંગમાં રહેતી ગૃહિણી વર્ષા (માસુમેહ માખીજા)ની. એક જમાનામાં એ શંકર (શર્મન જોશી) નામના યુવાનને પ્રેમ કરતી હતી. પરંતુ આજે એ એક દારુડિયા પતિની ગુલામી વેંઢારી રહી છે.
  • ત્રીજી સ્ટોરી છે વોહી ચ બિલ્ડિંગમાં પ્રેમમાં પડેલાં પુખ્ત વયનાં ટીનેજર્સની. બંનેને એકબીજા સાથે લગ્ન કરવાં છે પણ પેરેન્ટ્સ હૈ કિ માનતે હી નહીં. એમાં એક લોચો એ છે કે એ બંનેમાંથી એક પાત્ર હિન્દુ છે અને  બીજું મુસ્લિમ. એટલે મુદ્દો નેશનલ ઇન્ટરેસ્ટનો છે. પરંતુ એથીયે મોટો બીજો એક લોચો પણ છે, જે સિક્રેટ છે.
  • આ બિલ્ડિંગમાં એક ચોથી-ઇત્તુ સી સ્ટોરી પણ આકાર લઈ રહી છે, જે ‘શોલે’નાં જય-રાધા (અમિતાભ-જયા)ની લવસ્ટોરીની જેમ ઓલમોસ્ટ સાઇલન્ટ્લી આગળ વધતી રહે છે. એ સ્ટોરી છે રિચા ચઢ્ઢા અને એક સમયે ચુંબનો કરવામાં ઇમરાન હાશમી પણ જેને ગુરુપદે સ્થાપે છે એવા હિમાંશુ મલિકની. ટકલુ અને PNBના કૌભાંડ જેવા જાડિયા થઈ ગયેલા હિમાંશુ મલિકને ઓળખવા માટે કોન્ટેસ્ટ રાખવા જેવી છે!
  • મોડરેટલી ઇન્ટરેસ્ટિંગ એવી આ ફિલ્મ લગભગ પોણા બે કલાકની છે, જેમાં સ્ટોરીઝ ઇન્ટરેસ્ટના ઊતરતા ક્રમમાં ગોઠવાયેલી છે. યાને કે રેણુકા શહાણેની સ્ટોરી સૌથી વધુ ઇન્ટરેસ્ટિંગ અને ઓલમોસ્ટ સાઇલોકોજિકલ થ્રિલર ટાઇપની છે. બાય ધ વે, લાંબા સમયે ફિલ્મી પડદે દેખાયેલાં રેણુકા શહાણેના ચહેરા પર જૂની બિલ્ડિંગ જેવો ડાઘાદાર મેકઅપ અને પૅકિંગ મૂકીને બનાવાયેલું બેડોળ શરીર જોઇને હાયકારો નીકળી જાય એવું છે. અમને તો સિદ્ધાર્થ કાક સાથે કોરસમાં ‘નમસ્કાર’ બોલીને ‘દૂરદર્શન’ પર ટૂથપેસ્ટની મૉડલ જેવા સ્માઇલ સાથે ‘સુરભિ’ની શરૂઆત કરતાં રેણુકા શહાણે જ પસંદ છે. હા, એમની એક્ટિંગને કોઈ ડાઘ નથી લાગ્યા!
  • બીજી અને ત્રીજી સ્ટોરીમાં ક્રમશઃ લોજિક અને મજા બંનેનો ઘટાડો થવા લાગે છે. એકબીજાથી વિખૂટાં પડી ગયેલાં પ્રેમી પંખીડાંવાળી શર્મન-માસુમેહની સ્ટોરીનું કારણ જાણીએ તો એ બંનેને વીસ વર્ષ સુધી ‘બિગ બોસ’ના હાઉસમાં પૂરી રાખવાની પાશવી ઇચ્છા થઈ આવે!
  • હા, એટલું ખરું કે ત્રણમાંથી એકેય સ્ટોરી સાવ આર્ટિફિશિયલ લાગતી નથી. તેનું કારણ છે ફિલ્મનાં અસરદાર એક્ટર્સ અને એમની ઓલમોસ્ટ રિયલિસ્ટિક એક્ટિંગ. વચ્ચે વચ્ચે ગીતોનાં બમ્પરિયાં આવતાં રહેવા છતાં ફિલ્મ આપણો રસ જાળવી રાખે છે.
  • લેકિન પ્રોબ્લેમ એ છે કે આ વાર્તાઓમાં જ ખાસ વજન નથી, ખાસ કરીને બીજી અને ત્રીજી વાર્તા. અને ત્રણેય વાર્તાઓમાં આગળના ટ્વિસ્ટને અગાઉથી કળી શકાય એવી પ્રીડિક્ટેબિલિટી પણ ખરી.
  • ઇન્ટરેસ્ટિંગ છે, ફિલ્મનો ક્લાઇમેક્સ. અહીં ફર્સ્ટ ટાઇમ ડિરેક્ટર એવા અર્જુન મુખર્જી અને રાઇટર અલ્થિયા કૌશલે ટ્વિસ્ટ એન્ડિંગનો ઇન્ટરેસ્ટિંગ ઉપયોગ કર્યો છે. જેને જોઇને આપણે મુસ્કુરાઈ ઊઠીએ અને આપણને શ્યામ બેનેગલની ‘વેલકમ ટુ સજ્જનપુર’, ‘ચોકલેટ’ (મૂળ હૉલિવૂડની ‘યુઝવલ સસ્પેક્ટ્સ’), હોરર ફિલ્મ ‘પિત્ઝા’ જેવી ફિલ્મો યાદ આવી જાય.
  • એમ તો ડ્રોન કેમેરાના ઉપયોગથી એક પછી એક લોકોનાં ઘરોમાં ડોકિયાં કરાવતી ટ્રીટમેન્ટ જોઇને મને અલ્ફ્રેડ હિચકોકની ક્લાસિક ફિલ્મ ‘રિઅર વિન્ડો’ પણ મગજમાં પોપઅપ થયા કરતી હતી.
  • ‘3 સ્ટોરીઝ’ જેવી શૉર્ટ ફિલ્મો જોઇને મને કાયમ એક સવાલ થતો રહે છે કે શૉર્ટ ફિલ્મ્સ કાયમ સૅડ, મૅલન્કોલિક, ટ્રેજિક કે મગજનું GST થઈ જાય એવી સાઇકોલોજિકલ આંટીઘૂંટીઓ જ શા માટે હોય છે? અહીં તો સૅડનેસ ઉપરાંત ભૂતકાળની ભૂતાવળો પણ ચામાચીડિયાંની જેમ ઘૂમરાતી રહે છે. પરંતુ વાત એ છે કે શૉર્ટ ફિલ્મો ‘કન્ચે ઔર પોસ્ટકાર્ડ’ જેવી હળવીફુલ કેમ ન હોય? ખેર…
  • જાતભાતની કોમ્પિટિશન્સ અને ડિજિટલ રિવોલ્યુશનના પ્રતાપે અત્યારે ઇન્ટરનેટ પર શૉર્ટ ફિલ્મોનો રાફડો ફાટ્યો છે. ત્યારે આવી સુસાઇડ મિશન જેવી આવી ફિલ્મોમાં પૈસા રોકવા માટે ફરહાન અખ્તરની ‘એક્સેલ એન્ટરટેનમેન્ટ’ને પણ શાબાશી આપવી જોઇએ. પરંતુ ‘3 સ્ટોરીઝ’માં સિનેમેટિક એક્સલન્સ જેવા કોઈ તારા જડેલા છે નહીં. એટલે આ ફિલ્મને થિયેટરમાં જઇને જોવાનું તો સજેસ્ટ કરાય એવું છે નહીં. હા, ઑનલાઇન પ્લેટફોર્મ પર આવે ત્યારે જોઈ લેવાય ખરી.

રેફરન્સ જંક્શનઃ

Copyright © Jayesh Adhyaru. Please do not copy, reproduce this article without my permission. However, you are free to share this URL or the article with due credits.

Advertisements

One comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s