બાહુબલિ- ધ બિગિનિંગ

baahubalis-international-poster-releasedધોધમાર વરસાદમાં એક નવજાત બાળકનો જીવ બચાવતી એક સ્ત્રી નદી પાર કરી રહી છે. પાછળ લોહી તરસ્યા સૈનિકો પડ્યા છે. પાણીમાં ઊભીને એ સ્ત્રી ગગનભેદી અવાજે ઈશ્વરને લલકારે છે અને એ બાળકની સલામતીનો હવાલો સોંપે છે. પાણીની બહાર રાખેલા એક હાથમાં બાળક સલામત છે અને એ સિવાય આખી સ્ત્રી પાણીની અંદર ડૂબેલી રહીને નદી પાર કરે છે. પ્રચંડ જળરાશિ ફેંકતા ધોધ પર એક યુવાન ચડી રહ્યો છે. ધોધની પેલે પાર શું છે એ એને જોવું છે. નીચે જોતાંય બીક લાગે એટલી ઊંચાઇએથી એ સામે આવેલા ખડક પર પહોંચવા કૂદકો મારે છે. થોડુંક છેટું પડે છે અને એ ખાબકે છે સીધો નીચે આવેલી અફાટ જળરાશિમાં.

વેલકમ ટુ ધ વર્લ્ડ ઑફ એસ. એસ. રાજમૌલિ. આપણે ભલે એમની તેલુગુ ‘માગાધીરા’ ન જોઈ હોય, પરંતુ એમની તેલુગુ ફિલ્મો પરથી બનેલી ‘મખ્ખી’, ‘સન ઑફ સરદાર’ અને ‘રાઉડી રાઠૌર’ તો જોઈ જ છે. ૭૦ નહીં બલકે ૧૪૦ એમએમનો પડદો પણ નાનો પડે એવી લાર્જર ધેન લાઇફ ઇમેજિનેશન કરનારા રાજમૌલિ વિશે કહેવાય છે કે એ માખી કે કોક્રોચને લઇને પણ સુપરડુપર હીટ ફિલ્મ બનાવી શકે. એમની આ નવી એપિક ફિલ્મ ‘બાહુબલિ’ કેટલી વિરાટ કૅન્વસ પર બની છે તેનો એકમાત્ર પુરાવો એ છે કે લગભગ અઢીસો કરોડ રૂપિયાના બજેટ સાથે તે ભારતીય સિનેમાની સૌથી મોંઘી ફિલ્મ છે.

ગુડ વર્સસ ઇવિલ

શિવગામી દેવી (રામ્યા ક્રિશ્નન) નામની એક સ્ત્રી એક નવજાત બાળકને મહામહેનતે બચાવે છે. એ પરાક્રમી બાળક શિવા (પ્રભાસ) મોટો થઇને જ્યારે અભેદ્ય ગણાતો વિરાટ ધોધ ઓળંગે છે, ત્યારે ખ્યાલ આવે છે કે એ તો એ રાજ્યનો વારસદાર છે. ડાકુ હસીના જેવી એક મારકણી યૌવના અવંતિકા (તમન્ના ભાટિયા) બીજા કેટલાક યોદ્ધાઓ સાથે ગેરિલા હુમલા કરીને પચ્ચીસ વર્ષથી બંદી બનાવાયેલી એક વૃદ્ધાને છોડાવવાનો પ્રયાસ કરી રહી છે. ધોધ ચડીને આવેલો આપણો હીરો એ કામ કરી બતાવે છે. એ સાથે જ બહાર આવે છે વીરતા, ક્રૂરતા, સત્તા માટેની સાઠમારી, દગાખોરી અને પ્રેમની એક અભૂતપૂર્વ દાસ્તાન. કથાના વર્તમાન સમયથી પચાસ વર્ષ પહેલાંની વાત છે. માહિષમતિ સામ્રાજ્યના બે વારસદાર છે, અમરેન્દ્ર બાહુબલી (અગેઇન પ્રભાસ) અને ભલ્લાલ દેવ (રાણા દગુબત્તી). સિંહાસન પર બિરાજવા માટે બંનેએ પોતાની યોગ્યતા સાબિત કરવાની છે. ત્યાં જ રાજ્ય પર એક અત્યંત ક્રૂર અને પાંચ ગણી વિશાળ સેના હુમલો કરે છે. મહાભારતની યાદ અપાવી દે તેવું લોહિયાળ યુદ્ધ ખેલાય છે. આ યુદ્ધનું એવું પરિણામ આવ્યું કે માહિષમતિ સામ્રાજ્યને નરકથીયે બદતર હાલતમાં ફેંકી દીધું. હવે જોવાનું એ છે કે બાહુબલિ આ સામ્રાજ્યને અને તેના નિર્દોષ લોકોને જલ્લાદોના હાથમાંથી બચાવી શકશે?

મહાગાથાનાં સાક્ષી બનવાનાં કારણો

આપણે તો સલમાન-શાહરુખ-આમિરની ફિલ્મો જોનારા. આપણે વળી તેલુગુ ભાષામાંથી ડબ થયેલી રાજા-રાણીની સત્તાની સાઠમારીવાળી ફિલ્મ શા માટે જોઇએ? વેલ, આ રહ્યાં કારણો…

  • એસ. એસ. રાજમૌલિઃ આ ફિલ્મમેકરની કલ્પનાને કોઈ મર્યાદાઓ નડતી નથી. આ ફિલ્મમાં એમણે મસ્ક્યુલિનિટી અને નજાકત બંનેને એવી કાબેલિયતથી પેશ કરી છે જે આપણે પડદા પર ભાગ્યે જ જોઈ હોય. જેને હલાવવાની કલ્પના સુદ્ધાં ન થઈ શકે એવડું ભારેખમ શિવલિંગ લઇને હીરો પ્રચંડ ધોધ નીચે મૂકી આવે છે, આગળ કહ્યું તેમ થિયેટરમાં જોઇને પણ બીક લાગે એવા મોટા ધોધ પર એ ચડે છે, પડે છે અને ફરી ચડે છે, સોનાની વિરાટ મૂર્તિને પડતી એકલો બચાવે છે, હાથી અને માતેલા સાંઢ હાથના પ્રહાર માત્રથી ચિત્ત થઈ જાય છે. જ્યારે એક મુખવટામાંથી કલ્પનાતીત સૌંદર્ય મૂર્તિનો ચહેરો સર્જાય છે, યૌવનાની કાયા પર અનોખી પરિસ્થિતિમાં ટેટૂ ચિતરાઈ જાય છે, એની સાથે બથ્થંબથ્થા યુદ્ધ કરતાં કરતાં જ એને શૃંગાર થઈ જાય છે અને યોદ્ધામાંથી એનું એક અપ્સરામાં રૂપાંતર થઈ જાય છે. આવું તો કેટલુંય આ ફિલ્મમાં ભરેલું પડ્યું છે, જે અલ્ટિમેટલી એક જ વાક્ય કહે છે, એસ. એસ. રાજમૌલિ જૈસા કોઈ નહીં.
  • સ્પેશ્યલ ઇફેક્ટ્સ અને સિનેમેટોગ્રાફીઃ આ ફિલ્મની સૌથી મોટી ખાસિયત એ છે કે તે ૩ડીમાં નથી. તેમ છતાં તેમાં આંખો પહોળી થઈ જાય એવા ભવ્ય મહેલો, સામસામે ટકરાતાં વિરાટ સૈન્યો, અનોખાં યુદ્ધ કૌશલ્યો, ભારતને સ્વર્ગલોક જેવું બનાવીને પેશ કરતી સિનેમેટોગ્રાફી… આ બધું જ જોઇને આપણી આંખો પણ મલ્ટિપ્લેક્સના પડદા જેવી પહોળી થઈ જાય છે. ક્યાંક કશું ગુમાવી બેસીશું એ ભયે આપણને આંખો પટપટાવવાનું પણ મન ન થાય એવી જાદુઈ દુનિયા અહીં પડદા પર ઊભી થઈ છે. હા, વિશાળ રાજમહેલ કેટલેક ઠેકાણે કમ્બોડિયાના પ્રખ્યાત અંગકોર વાટ મંદિર જેવો અને કૃત્રિમ લાગે છે. પરંતુ આપણે કોઈ કમ્પ્યુટર ગ્રાફિક્સથી ઊભરાતી ફિલ્મ જોઈ રહ્યા છીએ એવી ફીલિંગ ક્યારેય નથી આવતી. અરે, અહીં કેવી નાની નાની વાતમાં પણ ચીવટ રખાઈ છે, એનો એક જ દાખલો. અભિનેતા નાસિરના પાત્રને ડાબા હાથમાં પોલિયો છે. એ હાથ માત્ર સ્થિર રાખી દેવાને બદલે તેને પોલિયોથી રીતસર કૃષ થઇને બૅન્ડ થઇ ગયેલો સુધ્ધાં બતાવ્યો છે.
  • પર્ફોર્મન્સઃ કુદરતની ચેલેન્જ સામે દો-દો હાથ કરતાં દૃશ્યો સાથે હીરો પ્રભાસની એન્ટ્રી, હિમાલયન યાક સાથે બાથ ભીડતી દિલધડક એક્શન સિક્વન્સ સાથે સુપર વિલન રાણા દગુબત્તીનું ઇન્ટ્રોડક્શન, એક સ્ત્રી ધારે તો કેવું ચંડિકાનું સ્વરૂપ ધારણ કરી શકે તે બતાવતી રામ્યા ક્રિશ્નનની પારફુલ એક્ટિંગ અને એક વફાદાર સેનાપતિ કટપ્પાના પાત્રમાં એક્ટર સત્યરાજની પડછંદ પર્સનાલિટી, આ બધું જ આપણને ખુરશીમાંથી સહેજ પણ ચસકવાનો મોકો નથી આપતું. અભિનેતા સત્યરાજને આપણે છેલ્લે ‘ચેન્નઈ એક્સપ્રેસ’ ફિલ્મમાં દીપિકા પદુકોણના પપ્પાના રોલમાં જોયેલા.

તેમ છતાં

હૉલીવુડની ‘૩૦૦’, ‘ગ્લેડિયેટર’, ‘લૉર્ડ ઑફ ધ રિંગ્સ’ને ટક્કર મારે એવી હોવા છતાં આ ફિલ્મ અમુક ડિપાર્ટમેન્ટમાં અત્યંત પાછળ પડી જાય છે. એક તો તેનું સંગીત. દિગ્ગજ સંગીતકાર એમ. એમ. ક્રીમે સંગીત આપ્યું હોવા છતાં આ ફિલ્મના એકેય ગીતમાં કશો જ ભલીવાર નથી. ઊલટું, ઇન્ટરવલ પછી આવતું એક સસ્તું આઇટેમ સોંગ એક થ્રિલર વાર્તાની ગતિમાં મોટું ખાતર પાડી દે છે. હા, જોકે એ ગીતની પહેલાં સાકી તરીકેની ભૂમિકામાં ખુદ દિગ્દર્શક એસ. એસ. રાજમૌલિ મહેમાન કલાકાર તરીકે દેખાય છે ખરા. હિરોઇન તમન્ના ભાટિયા દેખાવે કોઈ અપ્સરાથી કમ સુંદર નથી. પરંતુ તેની સાથેની હીરો પ્રભાસની લવસ્ટોરી ખાસ્સો એવો સમય લઈ લે છે અને મૂળ વાર્તા શરૂ થતાં સુધીમાં આપણી ધીરજની કસોટી કરી લે છે. સશક્ત અભિનેતા એવા નાસિરને સાવ સત્ત્વહીન રોલમાં વેડફાતા જોઇનેય આપણું પા શેર લોહી બળી જાય છે.

ચાલો, મહાગાથાના સાક્ષી બનવા

ઘણા લોકોને આ ‘બાહુબલી’ ફિલ્મ આપણી ‘મહાભારત’ની વાર્તાની યાદ અપાવશે. તો અમુક પઢાકુ લોકો એવુંય કહેશે કે આમાં તો અમિશ ત્રિપાઠીની અંગ્રેજી નવલકથા ‘ઇમ્મોર્ટલ્સ ઑફ મેલુહા’ની ઝલક દેખાય છે. ત્યાં રજનીકાંતના ચાહકો બોલી ઊઠશે કે અરે, અમારા થલૈવાની એનિમેટેડ ફિલ્મ ‘કોચ્ચદૈયાં’ની વાર્તા પણ આવી જ હતી. અરે, ‘બાહુબલિ’ની લાંબી વૉર સિકવન્સ ૨૦૦૮માં આવેલી ચાઇનીઝ વૉર ફિલ્મ ‘રેડક્લિફ’ની પણ યાદ તાજી કરાવે છે. પરંતુ યકીન માનો, એનાથી આ ફિલ્મની મજામાં એક તસુભાર પણ ઘટાડો નથી થતો. જો તમને એકબીજા સાથે ટકરાતા પુરુષાતનની પરાકાષ્ઠા જેવા વીરનરો, તલવારોનો ટકરાવ, હવામાંથી થતો તીરો-ગોળાઓનો વરસાદ, ઘેટાંબકરાંની જેમ વધેરાતાં માણસો, એક ઝાટકે ઊડી જતું માથું અને એ પછીયે ચાલ્યા કરતું ધડ, પ્રાચીનકાળનાં યુદ્ધ કૌશલ્યો અને અનોખી રીતે થતાં યુદ્ધ, એવરેસ્ટની ઊંચાઈને આંબતા વીરનાયકો, રાજ્ય માટે જાતને કુરબાન કરી દેતી સ્ત્રીઓ અને સ્ત્રીનો પડ્યો બોલ ઝીલતો મેટ્રિઆર્કિયલ સમાજ, રૂંવાડાં ઊભા કરી દે તેવી ફાઇટ્સ, શેર લોહી ચડાવી દે તેવી જોમવંતી વૉરસ્પીચ જોવા-સાંભળવામાં રસ પડતો હોય, તો આ ફિલ્મ તમારે થિયેટરમાં જોવામાંથી જરાય ચૂકવું ન જોઇએ.

અને હા, આ ‘બાહુબલી’ ફિલ્મ બે ભાગમાં છે. આ તેનો પહેલો ભાગ છે. જ્યારે બીજો ભાગ આવતા વર્ષે રિલીઝ થશે. એટલે વાર્તા અધૂરી મૂકીને ફિલ્મ અચાનક પૂરી થયાનો આંચકો લાગે તો યાદ કરી લેજો કે, પિક્ચર અભી બાકી હૈ મેરે દોસ્ત.

રેટિંગઃ **** (ચાર સ્ટાર)

(Published in Gujarati Mid Day)

Copyright © Jayesh Adhyaru. Please do not copy, reproduce this article without my permission. However, you are free to share this URL or the article with due credits.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s