B.A. Pass

પાસ ક્લાસ

***

ઇરોટિક પૅકિંગમાં પૅક થયેલી હોવા છતાં આ ઍડલ્ટ ફિલ્મ ‘Noir’ જેવા ફિલ્મ પ્રકારનું સરસ ઉદાહરણ છે.

***

1367782268_26_ba-pass-exclusive-new-poster_13675652750ધારો કે તમે સર્જક હો, તો આસપાસની સુંદરતમ ચીજો તમને પહેલી આકર્ષે. ગંદકી, ગરીબી, કુરુપતા વગેરે બાબતો આંખ સામે હોવા છતાં સામાન્ય રીતે આપણી આંખો તેને અવગણી નાખે છે. શહેરી ચકાચૌંધ પાછળ થઇ રહેલું નીતિમત્તાનું પતન અને ગરીબી તમારી પાસે કેવું કેવું કામ કરાવી શકે એના પર કેમેરા માંડ્યો છે દિગ્દર્શક અજય બહલે ફિલ્મ ‘બી.એ. પાસ’માં. પોસ્ટર્સ પરથી તો એવું જ લાગે કે આ ફિલ્મ પણ ગયા અઠવાડિયે આવેલી ‘નશા’ જેવી સોફ્ટ પોર્નોગ્રાફિક પ્રકારની જ હશે. સાચી વાત છે, અહીં પણ વાસનાનો જ કીડો ખદબદે છે, પરંતુ આ ફિલ્મ ગલગલિયાંને બદલે કેટલાક સવાલો ઊભા કરે છે…

ગરીબી અને વાસનાનું જીવલેણ કોકટેઇલ

ગરીબ મુકેશ (શાદાબ કમલ) ગામડેથી પોતાનાં ફોઇને ઘરે દિલ્હી બી.એ. કરવા આવ્યો છે. ફોઇ પણ પાક્કી છે. મુકેશ પાસેથી એના ખર્ચના પૈસા તો લે જ છે, સાથોસાથ પોતાની કિટ્ટી પાર્ટીઓમાં નોકરની જેમ ચાકરી પણ કરાવે છે. પાર્ટીમાં આવેલી એક સારિકા આન્ટીની નજર મુકેશ પર ઠરે છે અને મફતિયાં સફરજન લેવાના બહાને એને પોતાના ઘરે બોલાવે છે. હવે આ સારિકા આન્ટી (‘ચક દે ઇન્ડિયા’ ફેમ શિલ્પા શુક્લા) સવિતાભાભી ટાઇપ શૈય્યાસુખથી વંચિત ડેસ્પરેટ હાઉસવાઇફ છે. એ મુકેશને પોતાના શરીરનાં વળાંકોમાં ડુબાડી દે છે. ચેસ રમવાનો શોખીન મુકેશ સારિકા આન્ટીની વાસનાના દાવ સામે સીધો ચેક મેટ થઇ જાય છે. આ મુકેશનો એક ફ્રેન્ડ ફિલોસોફર ગાઇડ ટાઇપનો દોસ્તાર પણ છે, જ્હોની (દિવ્યેન્દુ ભટ્ટાચાર્ય). જ્હોની કબ્રસ્તાનમાં કોફિન બનાવવાનું કામ કરે છે, નવરાશમાં મુકેશ સાથે ચેસ રમે છે, રાત્રે દારુ પીવે છે અને પાર્ટટાઇમમાં મોરેશિયસ ભેગા થઇ જવાનાં સપનાં જુવે છે.

આર્ટ્સમાં ગ્રેજ્યુએશન કરી રહેલો મુકેશ સવિતાભાભી, સોરી, સારિકા આન્ટીની ‘બાયોલોજી’માં એવો ફસાય છે કે એની આખી ભૂગોળ એની આસપાસ જ ફરવા લાગે છે. ત્યાં જ બે ઘટનાઓ બને છે. એક તો મુકેશની બંને બહેનોને નારીગૃહમાં રાખવાની નોબત આવે છે, જ્યાં ઓલરેડી અવળા ધંધા ચાલે છે. બીજી બાજુ, સારિકા આન્ટી એને પોતાનાં જેવી જ બીજી વંચિત આન્ટીઓને સંતોષવાનું કામ સોંપે છે, જેના બદલામાં એ પૈસા કમાય છે. મતલબ કે સારિકા આન્ટી એને ગિગોલો યાને કે પુરુષ વેશ્યા બનાવી દે છે. આ કામ ગમતું ન હોવા છતાં, પોતાની બહેનોને નારીગૃહમાંથી છોડાવીને સ્વતંત્ર ભાડે ઘરમાં રાખવાની ઇચ્છાએ આ કામ કર્યે જાય છે. પણ અચાનક એક દિવસ સારિકા આન્ટીના પતિ ખન્ના (‘સ્પેશિયલ 26’ ફેમ રાજેશ શર્મા) બંનેને રંગેહાથ ઝડપી લે છે અને કહાની લેતી હૈ એક નયા મોડ…

નૈતિકતાનું મર્ડર

લેખક મોહન સિક્કાની ‘રેલવે આન્ટી’ નામની વાર્તા પરથી આ ફિલ્મ બની છે, જે ‘દિલ્હી નોઇર’ પુસ્તકમાં સંકલિત થઇ છે. વિવિધ ફિલ્મ ફેસ્ટિવલ્સમાં નવેક અવોર્ડ્સ જીતી ચૂકેલી આ ડાર્ક ફિલ્મ સ્વાભાવિક રીતે જ બધા માટે નથી. વારંવાર બેધડકપણે આવતાં સેક્સ સીન્સ ગલગલિયાં નથી કરાવતાં બલકે ડિસ્ટર્બ કરી મૂકે છે. ક્યારેક તો ઘૃણા થઇ આવે છે. ‘દેવ ડી’ પછી આ ‘બી.એ. પાસ’માં પણ દિલ્હીના બદનામ પહાડગંજ વિસ્તારમાં ચાલતા ગોરખધંધાઓની વાત થઇ છે. ઘણે ઠેકાણે ફિલ્મમાં બેકગ્રાઉન્ડ મ્યુઝિક પણ નથી. આપણા આશ્ચર્ય વચ્ચે ફિલ્મમાં દીપ્તિ નવલ પણ આવે છે, પરંતુ એ પોતાની દુઃખભરી દાસ્તાન સંભળાવીને ચાલ્યાં જાય છે.

ચારેય મુખ્ય કલાકારો (શિલ્પા શુક્લા, શાદાબ કમલ, દિવ્યેન્દુ અને રાજેશ શર્મા)ની એક્ટિંગ સરસ છે, પણ એમની અને ફિલ્મની બોલ્ડનેસ, નૈતિકતાનું મર્ડર અને અંતે થતી દગાખોરી આપણને વિચલિત કરી મૂકે છે. જો આવો છોછ ન હોય તો પ્રયોગ ખાતર આ ફિલ્મ જોઇ શકાય. આમાં મોટા પડદાના આકર્ષણ જેવું કશું નથી, એટલે ઓરિજિનલ ડીવીડી રિલીઝ થાય ત્યાં સુધી રાહ જોવામાં પણ કંઇ વાંધો નથી.

રેટિંગઃ ** (બે સ્ટાર)

(Published in Gujarati Mid Day)

Copyright © Jayesh Adhyaru. Please do not copy, reproduce this article without my permission. However, you are free to share this URL or the article with due credits.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s